१३ कात्तिक, गुल्मी/ आगामी मंसिर २१ मा हुने प्रदेशसभा र प्रतिनिधिसभा चुनावका लागि गुल्मीमा १ सय ३८ मतदान स्थल कायम गरिएको छ । गत स्थानीय तह निर्वाचनमा कायम भएका मतदान स्थललाई नै कायम गरिएको जिल्ला निर्वाचन अधिकृत गुल्मीका प्रमुख गणेशबहादुर खत्रीले जानकारी दिनु भएको छ । 
२ वटा निर्वाचन क्षेत्र रहेको गुल्मीमा जिल्लामा २ सय ५१ मतदान केन्द्र रहने जिल्ला निर्वाचन कार्यालय गुल्मीले जनाएको छ । गत असारमा सम्पन्न स्थानीय तह निर्वाचनमा २ सय ४० वटा मतदान केन्द्र कायम थिए ।
मतदाता संख्याको आधारमा ११ वटा केन्द्र थप भएको जिल्ला निर्वाचन अधिकृत खत्रीले जानकारी दिनु भयो । यसैबीच निर्वाचन शिक्षा प्रभावकारी बनाउन जिल्लामा २ सय ५१ जना निर्वाचन शिक्षा कार्यकर्ता र मतदाता शिक्षा स्वयसेवकहरु सिफारिस गर्ने निर्वाचन कार्यालय गुल्मीले जनाएको छ ।
मतदाता शिक्षालाई प्रभावकारी बनाउन सञ्चार जगत, नागरिक समाज, राजनैतिक दलहरुले सहयोग गर्न आग्रह गर्ने भएको छ ।
कार्यक्रममा जिल्ला समन्वय समिति गुल्मीका अध्यक्ष लक्ष्मण पराजुली, जिल्ल्लाका प्रमुख जिल्ला अधिकारी गोपाल अर्यालले आगामी मंसिरमा हुने निर्वाचनलाई शान्तिपूर्ण भयरहित वातावरणमा सम्पन्न गर्न सबैपक्षले सहयोग गर्न आग्रह गरे ।
हाम्रो संरचना । १३ कार्तिक २०७४, सोमबार ०६:२६