हाम्रो संरचना बिहिबार, बैशाख ९, २०७८ 580 Views

लामो समय देखि सम्पत्ति लगायतको अवस्थाका कारण विवादित बन्दै आएको बागेश्वरी मन्दिर प्रकरणमा अदालतले आदेश गरेको ६ महिनापछि बैठक बसि निर्णय प्रक्रियाहरु अघि बढेको छ ।
आदेशको लामो समयपछि मन्दिर ब्यवस्थापन गर्ने विषयमा जिल्ला प्रशासन कार्यालय सहित सरोकारवालाले फैसला कार्यान्वयनमा भूमिकाको सुरुवात गरेका हुन् ।


मन्दिरको सम्पत्तिब्यवस्थापन, सरसफाई जस्ता कार्यका लागी प्रभावकारी कदम चाल्न जिल्ला प्रशासन कार्यालय बाँके, मन्दिर ब्यवस्थापन समिति सहित मुद्दामा बिपक्षी बनाईएकाहरुलाई अदालतले आदेश दिएकोमा आइतवार बसेको बागेश्वरी गुठी ब्यवस्थापन समितिको बैठकले ४ वटा निर्णय गरेको छ ।
बागेश्वरी मन्दिर पश्चिम नेपालकै धार्मिक, ऐतिहासिक, सांस्कृतिक र पर्यटकीय क्षेत्र एवं समस्त नेपालीको गौरवको बिषय भएकोले मन्दिर अझ बढी व्यवस्थित र स्तरोन्नतीका लागि मन्दिरको उचित ब्यवस्थापन गर्न अधिवक्ता लोक बहादुर शाह लगायतका कानून ब्यवसायीले तत्कालिन पुनरावेदन अदालतमा मुद्दा दायर गरेका थिए ।
अदालतले गरेको फैसलामा मन्दिर ब्यवस्थाका लागि अनुगमन समिति गठन गर्न आदेश भएको थियो । अदालतको आदेशपछि मन्दिर ब्यवस्थापन समिति र सरोकारवाला बिच बैठक बसी चासो थालिएको हो ।
मन्दिरको आर्थिक पारदर्शिता कायम राख्ने लगायत विषयमा निर्णय भएको हो, बाँकेका प्रमुख जिल्ला अधिकारी एवं मन्दिर ब्यवस्था समितिका अध्यक्ष रविलाल पन्थले भने, मन्दिरको बारेमा व्रोसर निकाल्ने, प्रचारप्रसार गर्ने, जुंगे महादेव मन्दिर जाने जिर्ण पुलको पुननिर्माण गर्ने, मन्दिरमा शौचालयको ब्यवस्थापन गर्ने, सरसफाई गर्ने, त्यहाँ रहेका अब्यवस्थित पसल टहरालाई हटाउने, मन्दिरमा चढाइएको भेटीलाई पारदर्शी तरिकाले ब्यवस्थित गर्ने निर्णय भएको हो ।
बागेश्वरी मन्दिर व्यवस्थापनको विषयमा बागेश्वरी मन्दिरलाई अझ बढी सुव्यवस्थित र पारदर्शी गरी ऐतिहासिक, धार्मिक, सांस्कृतिक धरोहरको संरक्षण र सम्वद्र्धन गर्न दायर भएको रिटमा अदालतबाट अषाढ २२ गते मन्दिरलाई व्यवस्थित गर्न बिपक्षीहरुलाई आदेश भएको थियो ।
सो फैसलाको कार्यान्वयनको लागि अदालतले जिल्ला प्रशासन कार्यालय तथा मन्दिर सहितका पक्षलाई पत्राचार गरी जानकारी दिएपनि फैसला कार्यान्वयन हुन सकेको थिएन । बागेश्वरी गुठी ब्यवस्थापन समितिको आईतवार बसेको बैठकले बागेश्वरी मन्दिरको सम्पत्ति ब्यवस्थापन, परिसर सरसफाई लगायत सम्पुर्ण कुराको नियमित अनुगमन गर्न समिति गठन गरेको बताइएको छ ।
जिल्ला प्रशासन कार्यालय बाँकेका सहायक प्रमुख जिल्ला अधिकारी जनकराज पन्तको संयोजकत्वमा मालपोत कार्यालय बाँकेका मालपोत अधिकृत मुक्ति प्रसाद शर्मा र ब्यवस्थापन समितिका तर्फबाट खटाइएका कौशल कुमार मिश्र रहेको तिन सदस्यीय अनुगमन समिति गठन गर्ने निर्णय गरिएको पन्थले जानकारी दिए ।
बैठकले मन्दिर परिसर भित्र रहेको जुंगे महादेवको मन्दिर प्रवेश गर्ने पुल जिर्ण अवस्थामा रहेको पुल पुनर्निर्माण तथा
पोखरी ब्यवस्थापनका लागि जिल्ला समन्वय समिति बाँकेलाई अनुरोध गर्ने निर्णय गरिएको प्रजिअ पन्थले बताए ।
मन्दिर परिसर भित्र रहेका अनियन्त्रित टहरा हटाउने निर्णय समेत भएको जिल्ला अधिकारी पन्थले बताए । भित्री क्षेत्रमा पसलहरु कारण मन्दिर कुरुप भएको भन्दै त्यसलाई ब्यवस्थापन गर्न अर्थात एक महिना भित्र हटाउन निर्णय भएको हो उनले भने ।
बागेश्वरी मन्दिरका बारेमा पुर्ण जानकारी दिने ब्रोसर प्रकाशित गर्न बागेश्वरी मन्दिरका महन्त चन्दननाथ योगीको संयोजकत्वमा जिल्ला प्रशासन कार्यालय बाँकेका सहायक प्रमुख जिल्ला अधिकारी जनकराज पन्त र अधिवक्ता लोक बहादुर शाह सदस्य रहेको ३ सदस्यीय समिति गठन गर्ने निर्णय भएको अधिवक्ता शाहले बताए ।
बैठकमा बाकेका प्रमुख जिल्ला अधिकारी रबिलाल पन्थ, स्थानीय समन्वय अधिकारी अधिकारी हरि प्याकुरेल, गुठी संस्थानका अध्यक्ष लक्ष्मण ज्ञवाली लगायतको उपस्थिति रहेको थियो ।
बागेश्वरी मन्दिर नेपालगन्जको मात्रै हैन, नेपाल र भारतबाट हरेक वर्ष यहाँ हजारै श्रद्धालु र पर्यटकहरु आउने गरेको मन्दिर ब्यवस्थापन समितिको भनाइ छ । मन्दिर रहेको स्थानमा सतीदेवीको जिब्रो पतन भएको विश्वास गरिन्छ ।
ऐतिहासिक बागेश्वरी मन्दिर वि।सं।१८८८ मा निर्माण भएको शिलालेखबाट देखिन्छ । विश्वमा विकासको क्रम तीब्र रुपमा अघि बढिरहेका बेला अब कतिपयलाई ऐतिहासिक र पर्यटकीय सम्भावना बोकेको धार्मिक आस्थाको केन्द्र बागेश्वरी मन्दिरको सुधारमा अदालतको आदेशले सम्भावना बढाएको स्थानीयहरुको बुझाई छ ।
मन्दिर संग आय श्रोतको कमि छैन । मन्दिरको नाममा नेपालगन्ज उप महानगरपालिका इन्द्रपुरमा करिब ८४ बिघा जग्गा सहित करोडौं चल सम्पत्ती छ । मन्दिर श्रोतका अनुसार भक्तहरुबाट आउने चढावाको वार्षिक स्थिति पनि करोड माथिको छ ।
मन्दिरले आफ्नो मात्रै हैन, आवश्यक परे बाँके जिल्लाकै विकासमा आर्थिक सहयोग गर्न सक्ने संभावनाहरु पटक पटक ब्यक्त गरिएका छन् । अदालतको आदेश पछि बागेश्वरी मन्दिर परिसरमा देखिएको अब्यवस्था, फोहोर, झोपडपट्टी, अब्यवस्थित पसल, मगन्ते र जीर्ण भौतिक संरचनामा सुधार हुने संकेत देखा परेको बागेश्वरी मन्दिरका कार्यालय इन्चार्ज राजु केसीले बताए ।
‘एकै पटक सबै पसल हटाउनु भन्दा विस्तारै ब्यवस्थित गर्ने योजना हो’, केसीले भने, ‘मन्दिरमा आवश्यक पर्ने पूजा सामाग्रीको पसल मन्दिर आसपास हुनु पर्छ, मन्दिरको शोभा पनि ती पसलहरु हुन् ।’
२५ करोड लगातमा तलाउलाई बोटिंग विहार, झोपडपट्टीको ब्यवस्थापन, पार्क निर्माण, प्रयाप्त पार्किंग सुविधा, पुख्ता सुरक्षा ब्यवस्था, गुणस्तरीय लाईटिंग, लगेज र्याक, आवागमनको प्रभावकारी सिस्टम, ग्रीनबेल्ट, तलाउको सरसफाई, मन्दिरको स्वच्छताका लागि यसअघि पनि विभिन्न निर्णय र प्रयासहरु हुँदै आएको बताउँदै केसीले विस्तारै सुधार सम्भव रहेको प्रतिक्रिया दिए ।
मन्दिरपरिसरमा पूजा प्रसाद र सामाग्री बेच्ने २६ वटा पसल तथा १६ वटा सटर भाडामा रहेको छ ।