काठमाडौं /  केन्द्रीय अनुसन्धान ब्युरो (सीआईबी)ले नेपाली एटीएम बुथमार्फत विदेशीको खाताबाट पैसा चोर्ने गिरोहलाई यसै साता समात्यो । गिरोहमा तीन जना मोल्डोभियन नागरिक थिए । उनीहरूले विभिन्न माध्यमबाट अकाउन्ट डाटा लिने र त्यसलाई खाली एटीएममा प्रयोग गरी पैसा झिकेको दाबी सीआईबीको छ । प्रहरीले उनीहरूको साथबाट एटीएमको डाटा मेट्न र नयाँ अकाउन्ट डाटा राख्न प्रयोग हुने स्किमर मेसिन, एक हजारभन्दा बढी अकाउन्ट डाटा नियन्त्रणमा लिएको छ ।

नेपालमा भएका हालसम्मका एटीएम ठगीमा १८ जना विदेशी पक्राउ परेका छन् । प्रहरीले उनीहरूको साथबाट ८४ लाख २८ हजार नेपाली रुपैयाँ, ६३ हजार आठ सय ५५ अमेरिकी डलर र ६२ हजार नौ सय ५० युरो बरामद गरेको छ ।

एटीएममार्फत यो ठगी नेपालमा पहिलो भने होइन । प्रहरीको दाबीअनुसार नेपालमा तीन वर्षदेखि एटीएम ठगी सुरु भएको हो । एटीएम ठगी पछिल्लो समय भने अनेक रूपमा देखिन थालेको छ । एटीएम ठगीमा विगतमा एटीएम बुथ प्रयोग हुने गरेको समाचार आउँथे भने पछिल्लो समय स्वाइप मेसिनको समेत प्रयोग हुने गरेको खुलासा भएको छ । सामान किनेपछि त्यसको भुक्तानीका लागि प्रयोग हुने स्वाइप मेसिन ठगले सामान किन्न भन्दा पनि पैसा झिक्न प्रयोग गर्ने गरेको प्रहरी अनुसन्धानबाट देखिएको छ ।

सामान किनेपछि भुक्तानीका लागि प्रयोग हुने स्वाइप मेसिन ठगले पैसा झिक्न प्रयोग गर्ने गरेको प्रहरीको दाबी ।

महानगरीय अपराध महाशाखाले यसै महिना स्वाइप मेसिनमार्फत एटीएम ठगी गर्ने गिरोहलाई पक्राउ ग¥यो । यो गिरोह करोडौं रुपैयाँ स्वाइप मेसिनमार्फत निकालेपछि प्रहरीको फन्दामा परेको हो । एटीएम ठगीमा पछिल्लो समय केही नयाँ कुरा बाहिर आएका छन् । त्यसमा स्वाइप मेसिनको प्रयोग, नेपालीको संलग्नता र व्यवसायीको समेत मिलेमतो हुने गरेको छ । विगतमा भएका एटीएम ठगीको घटनामा विदेशीको संलग्नता मात्र देखिएको थियो । तर, स्वाइप मेसिनमार्फत भएको ठगीले नेपालीको संलग्नता र नेपाली व्यवसायीको मिलेमतो पनि बाहिर आएको छ ।

यसका कारण केही नेपाली व्यवसायी पक्राउ परिरहेका छन् भने अन्य केही फरार छन् । महानगरीय अपराध महाशाखाले गत साता मात्र पोखराबाट टीका रिसोर्टका मालिक टीका पौडेललाई पक्राउ गरी काठमाडौं ल्याएको छ । उनले एटीएम ठगीको गिरोहसँग मिलेर स्वाइप मेसिनबाट पैसा निकालेको प्रहरीको भनाइ छ । महाशाखाले काठमाडौंबाट पक्राउ गरेका सुरेश केसी, सञ्जय सिंह भनिने केवल प्रताप राणा, अभिषेक नकर्मी, अनुज नकर्मीको बयानका आधारमा टीका पनि यस ठगीमा संलग्न रहेको पाइएको हो । भारतका आईटी इन्जिनियर ३० वर्षीय अभिषेक पाण्डे पनि पक्राउ परेका छन् ।

नेपालीबाटै ठगी सुरु

एटीएम ठगीका प्रायः घटनामा विदेशीको संलग्नता देखिए पनि यसको सुरु भने नेपालीबाटै भएको प्रहरी अनुसन्धानले देखाएको छ । अपराध महाशाखाका डीएसपी अजय केसी नेपालमा एटीएम ठगीको सुरुवात नेपालीबाटै भएको बताउनुहुन्छ । मुख्य सुरुवातकर्ता सुरेन्द्र महर्जन चार वर्षदेखि फरार रहेको प्रहरीको दाबी छ । सुरेन्द्रको मुख्य सहयोगीका रूपमा सुरेशले काम गर्थे । उनीहरूले गुगलबाट विदेशी गिरोहमार्फत अकाउन्ट डाटा किन्ने गर्थे जसको मूल्य ५० डलरदेखि पाँच सय डलरसम्म रहने गरेको प्रहरीको दाबी छ । ‘यस्ता डाटा किन्दा जोखिम पनि उत्तिकै हुने गर्छ । कुनै अकाउन्टमा पैसा नहुन वा थोरै हुन पनि सक्छ’, डीएसपी केसी भन्नुहुन्छ । सुरेन्द्रले नै पोखरामा टीकासँग सम्पर्क गरी स्वाइप मेसिनबाट पैसा निकाल्ने धन्दा सञ्चालन गरेका थिए ।

तर, बैंकको उजुरीपश्चात् सुरेन्द्र फरार भएपछि टीका र सुरेशबीच सम्पर्क बढेको थियो । पछिल्लो समय नेपालमा स्वाइप मेसिनमार्फत ठगी गर्ने नेपालीको नेतृत्व सुरेशले नै गर्ने गरेका थिए । दोलखा भीमेश्वरका सुरेशले ३१ वर्षीय सञ्जयलाई सम्पर्कमा ल्याए । ललितपुर कुसुन्तीका सञ्जय सुरेशको योजना सुनेर काम गर्न सहमत भए । सञ्जयले काठमाडौंका २७ वर्षीय अभिषेक नकर्मीलाई समूहमा ल्याए । अभिषेकका सहोदर दाइ हुन् ३० वर्षीय अनुज नकर्मी । यो समूहले भक्तपुरको पौराणिक थान्का सप्लायर्सबाट ४५ लाख, ठमेलको सोभेनियर हस्तकला पसलबाट ३० लाख र चाबहिलको चाँदनी ज्वेलर्सबाट ४५ लाख रुपैयाँ निकालेको प्रहरीको भनाइ छ ।

पौराणिक थान्काका मालिक विजय दोङ, सोभेनियरका मालिक नदिम खान र चाँदनी ज्वेलर्सका मालिक फरार छन् । दुई वर्षअघि नयाँदिल्लीमा पनि कपडा पसलबाट तीन लाख रुपैयाँ निकालेको दाबी गरिएको छ । ‘सुरेशको बयानका आधारमा नेपालमा विदेशीभन्दा अगाडि नेपालीबाटै एटीएम ठगी हुने गरेको देखिएको छ । उनकै बयानका आधारमा टीकाको पनि पहिचान भएको छ’, डीएसपी केसी भन्नुहुन्छ ।

गिरोहले व्यवसायीसँग मिलेर सामान नकिनी स्वाइप गर्ने र अकाउन्टमा पुगेको पैसा गिरोह र व्यवसायीले बाँड्ने गरेको प्रहरीको भनाइ छ । तर, लिकर वल्र्ड सपका मालिकले आफ्नो सामान बिक्री भए पनि स्वाइप गरेको रकम अकाउन्टमा नआएको भन्दै प्रहरीमा उजुरी गरेपछि सुरेशसहितको टोली पक्राउ परेको हो । यसपटक लिकर सपका मालिकका भाइ मिङमार शेर्पालाई प्रयोग गरी गिरोहले स्वाइप मेसिन घरमै लगेर कार्ड घोटेको थियो । करिब चार लाख रुपैयाँ रकम घोटिएपछि सञ्जय रक्सी लिन लिकर सप आएका थिए । ‘त्यहाँबाट लगिएको रक्सी अन्यत्र बेचिएको देखिएको छ ।

लिकर सपका मालिकले बैंकबाट पैसा नपाएर उजुरी गरेपछि मात्र हामीले गिरोहलाई समात्न सक्यौं’, प्रहरी भन्छन् । लिकर सपका मालिकलाई बैंकले स्वाइप गरिएको कार्ड ब्लक भएको र पैसा जान नसक्ने बताएपछि उनी झसंग भएका थिए । पक्राउ परेका भारतीय इन्जिनियर अभिषेक पाण्डे केही दिनभित्रै करोडौं पैसा झिक्ने योजना बनाएर नेपाल भित्रिएको प्रहरीको दाबी छ । ‘नत्र भने प्रहरीसम्म यो मुद्दा आइपुग्दैनथ्यो । व्यवसायी र गिरोह दुवै मिल्ने र पीडित विश्वको कुनै कुनामा रहने भएकाले यस्तो ठगी भएको थाहै पाइन्न’, डीएसपी केसी भन्नुहुन्छ, ‘अर्कोतर्फ बैंकहरूले पनि आफैं उजुरी गरेको पाइन्न ।’