हाम्रो संरचना बिहिबार, कार्तिक ४, २०७८ 809 Views

२१ भदौ, नेपालगञ्ज/ फौजदारी कसुर सम्बन्धी नयाँ कानुनमा श्रीमतीलाई जबर्जस्ती करणी गरे श्रीमानले जेल जानुपर्ने भएको छ। जबर्जस्ती करणी गर्ने श्रीमान् पाँच वर्ष जेल जानुपर्ने व्यवस्था कानुन संसदबाट पास भई प्रमाणीकरणको क्रममा छ।

हाडनातामा करणी गर्नेलाई जन्मकैदसम्मको सजाय तोकिएको छ। १८ वर्षमुनिका युवतीसँग मञ्जुरीमै शारीरिक सम्बन्ध राखे पनि करणी गरेको ठहरिनेछ। जबर्जस्ती करणी गर्नेलाई महिलाको उमेर हेरी सजाय निर्धारण गरिएको छ।

मुलुकी ऐन प्रतिस्थापनका लागि ल्याइएको फौजदारी कसुरसम्बन्धी नयाँ कानुनमा करणीसम्बन्धी नयाँ व्यवस्था गरिएको हो। यो कानुन संसदबाट पारित भइसके पनि राष्ट्रपतिबाट प्रमाणीकरण हुन बाँकी छ।

राष्ट्रपतिले यो कानुन प्रमाणीकरण गरेमा १ भदौ ०७५ बाट मात्र कार्यान्वयनमा आउनेछ। आफूलाई यौनरोग, एचआईभी एड्स भएको थाहा पाउँदा-पाउँदै कुनै पुरुषले महिलामाथि जबर्जस्ती करणी गरे माथि उल्लिखित सजायमा थप तीन वर्षसम्म कैद सजाय हुने कानुनी व्यवस्था छ ।

सामूहिक रूपमा जबर्जस्ती करणी गर्ने, ६ महिनाभन्दा बढीको गर्भवतीलाई करणी गर्ने, मानसिक एवं शारीरिक रूपमा अशक्त, अपांगता भएकालाई जबर्जस्ती करणी गरे माथि उल्लिखित सजायमा थप तीन वर्षसम्म कैद थपिनेछ।

कसैले आफूलाई जन्म दिने आमा वा आफूले जन्माएको छोरीलाई करणी गरे जन्मकैद हुने व्यवस्था छ। सौतेनी आमाछोरा वा बाबुछोरी, सहोदर दिदीभाइ वा दाजुबहिनी, एकै हाँगाको ससुरा–बुहारी, एकै हाँगाको बाजे–नातिनी वा पनातिनी, एकै हाँगाका जेठाजु र भाइबुहारी वा देवर–भाउजूको करणी भएमा चार वर्षदेखि १० वर्षसम्म कैद र ४० हजारदेखि एक लाख रुपैयाँसम्म जरिवानाको सजाय हुनेछ। तीन पुस्तासम्मको हाडनातामा करणी गर्नेलाई तीन वर्षदेखि ६ वर्षसम्म कैद र ३० हजारदेखि ६० हजार रुपैयाँसम्म जरिवाना हुनेछ।