हाम्रो संरचना बिहिबार, कार्तिक ११, २०७८ 275 Views

१२ असार, हुम्ला / जिल्लाको दक्षिणी क्षेत्रमा रहेको सर्केगाड गाउँपालिका–३ मा गाँठेकीरा रोगले कोदोबाली नष्ट गरेको छ । वडा नं ३ मा रहेको गुसालेकमा गत चैतमा लगाएको कोदोबाली रोगले नष्ट गर्दा स्थानीयवासी चिन्तित छन् । गत चैतमा कृषकले खेतबारीमा छर्केको कोदोबाली कात्तिकमा उत्पादन हुने भए पनि गाँठेकीराले बाली नष्ट गर्दा त्यहाँका कृषकलाई समस्या बनाएको छ । पहाडी क्षेत्रमा उत्पादन हुने कोदोबालीमा रोग फैलिँदा उम्रिदै गरेको बाली गाँठेकीराले नष्ट गरेपछि कृषकले बारीमा कोदो फेरि छर्केका छन् ।

रोगको प्रकोपका कारण त्यहाँका किसानले कीटनाशक औषधि प्रयोगका लागि कृषि ज्ञान केन्द्र हुम्लामा जानकारी गराए पनि कुनै सुनुवाइ नभएको कृषक जीवन फडेराले जानकारी दिनुभयो । गाँठेकीराले कोदोबाली नष्ट गरेपछि पुनः उत्पादन गर्न खेतमा कोदो छर्कँदा कहिले उम्रेर कहिले फल लाग्ने भन्नेमा कृषक चिन्तामा परेका छन् । कोदो राम्रोसँग सर्न नपाउँदै पानी पर्न बन्द भएकाले पनि बारीमा कोदोको बोटमा रोग लागेको हुनसक्ने कृषकले बताउँदै आएका छन् । शुरुदेखि नै कोदोमा गाँठेकीरा, ग्वारोकीरा र खुम्लेकीराले सताउनुका साथै गोड्ने समयदेखि कोदोमा ढुसी, जरा कुहिने र फट्याङ्ग्राको प्रकोप अत्यधिक रहेको कृषकको भनाइ छ ।

आधुनिक खेती प्रणालीमा जान नसक्दा र व्यावसायिक खेती गर्न नसकेर कृषकले परम्परागत खेती गर्दा यस्तो समस्या निम्तिएको हो । कोदोबालीमा रोग लागेर नष्ट भएपछि त्यहाँका किसान भने कात्तिकमा के खाने भन्नेमा चिन्तित देखिएका छन् । छ महीनाको खेतीपाती छ महीनासम्म पुर्याउनुपर्ने जिल्लाका कृषकलाई यो वर्षको रोगले समस्या हुने भएको छ । यस्तै जिल्लाको सिमकोट गाउँपालिका–२ मा पनि कात्तिकमा उत्पादन हुने कोदोमा रोग देखापरेको किसानले बताएका छन् ।