१३ पुस, काठमाडौं/ काठमाडौंको सुकेधारा स्थित यातायात व्यवस्था विभागको लाइसेन्स कार्यालयका प्रमुख तथा उप-सचिव सुन्दर भट्टराई र शाखा अधिकृत यमलाल ढकाललाई अख्तियार दुरुपयोग अनुसन्धान आयोग टंगालबाट खटिएको टोलीले पक्राउ गरेको छ।
नक्कली कागजात तयार गरी साउदी अरेवियन सवारी चालक अनुमति-पत्रको आधारमा नेपाली सवारी चालक अनुमति(पत्र बनाई दिने गरेको आरोपमा उनीहरु पक्राउ परेका हुन् ।
अख्तियार दुरुपयोग अनुसन्धान आयोग टंगालबाट खटिएको टोलीले उनीहरुलाई नियन्त्रणमा लिएर अनुसन्धान सुरु गरेको छ । उनीहरुमाथि लाइसेन्स नेपालीकरण गर्ने नाममा फर्जी कागजात तयार गरी ८० हजार रुपैयाँ सम्म लिएर लाइसेन्स बेचेको आरोप लागेको छ ।
उनीहरुलाई यातायात व्यवस्था विभागले हिजो बुधबार मात्रै कार्यालयबाट विभागमा तानेको थियो । भौतिक पूर्वाधार तथा यातायात मन्त्रालयको सचिवस्तरीय निर्णयबाट उनीहरुले अनियमत रुपमा काम गरेको ठहर गर्दै अख्तियारलाई थप अनुसन्धान गर्न पत्र लेखेको थियो ।
यसअघि पुस ९ गते पनि यातायात व्यवस्था कार्यालय सुकेधारा काठमाडौंका कार्यरत नायव सुव्बा यादव पौडेल र खरिदार सुमन पोख्रेललाई सोही कामको लागि सेवाग्राहीसँग ३२ हजार रुपैयाँ घुस लिइरहेकै अवस्थामा अख्तियारको टोलीले पक्राउ गरेको थियो ।
आज बिहीबारभूमि सुधार कार्यालय भक्तपुरमा कार्यरत नायव सुव्वा राजु गौतम मोही लगत कट्टा गर्ने प्रयोजनको लागि सेवाग्राहीसँग ६ हजार घुस लिँदै गर्दा पक्राउ परेको पनि अख्तियारले जनाएको छ ।
हाम्रो संरचना । १३ पुष २०७४, बिहीबार १९:३९